ROXAS CITY – Kumpirmado nga may anomalya nga natabo sa thumb mark sang isa ka senior citizen sa SAC form sang Social Amelioration Program (SAP).
Ini ang nagguwa sa fingerprint verification sang Capiz Provincial Crime Laboratory sa ginsumite nga thumb mark ni Mrs. Margarita Andrada sang Barangay Punta Tabuc, sining syudad.
Suno kay Police Master Sergeant Ronnie Recto, imbestigador sang Roxas City PNP nga positibo ang panagupnop ni Andrada nga may iregularidad sa distribusyon sang SAP sa City Social Welfare and Development (CSWD).
Paathag ni Recto na wala nagsantu ang thumb mark sang ginang sa front page sang SAC form subongman sa back page nga blur.
Nagapati man ang imbestigador nga ginhungod nga i-blur ang thumb mark sa back page para indi mahibaluan kun sin-o ang yara sa likod sini nga posible amo ang nagklamar sang P6,000 nga SAP.
Nakig-angut na ang pulisya sa DILG kag CSWD para makakuha sang specimen sa handwriting sang empleyado nga nag-assists kay Andrada sa releasing sang ayuda sa Barangay Dayao.
Sa tion nga may makita nga anomalya ang pulisya, pasakaan nila sang kaso nga perjury ang yara sa likod sang nasambit nga iregularidad.
Matandaan nga wala naka-avail si Mrs. Andrada sa SAP bangud isa ini ka GSIS pensioner.
