Ginsugo sang Deapartment of the Interior and Local Government ang istrikto nga pagpatuman sang Anti-Epal policy sa bug-os, nga nagadirekta sa tanan nga local government units kag DILG offices nga dali nga kuhaon ang mga ngalan kag itsura sang mga opisyal sa publiko sa tanan nga proyekto, programa, aktibidad, kag propriedad nga ginpunduhan sang gobyerno.
Suno sa DILG Memorandum Circular No. 2026-006, tanan nga provincial, city, municipal kag barangay nga opisyal, lakip ang mga DILG central, regional, kag field offices kag attached agencies, ginarequire nga siguruduhon nga wala sang ngalan, logo, initials, color motif, slogan, ukon bisan ano nga identifying symbol sang publikong opisyal nga makita sa project signage, markets, tarpaulines, kag pareho nga materyales nga ginpunduhan sang publiko nga kwarta.
Ginpabutyag sang Interior and Local Government Secretary Jonvic Remula nga ang mga proyekto sang gobyerno ginabayaran sang tawo kag indi dapat gamiton para sa personal nga pagpang promote.
Ang Circular nagadumdum sa prinsipyo sang 1987 Constitution nga ang pagserbisyo sa gobyerno isa ka pagsalig sang publiko, pati na ang Code of Conduct and Ethical Standards for Public Officials and Employees, kag ang mga patakaran sang Commission on Audit nga nagakilala sa amo nga mga personalisado nga display bilang indi kinahanglanon nga gastuhan. Ginapabakud pa ini sang 2026 General Appropriations Act nga hayag nga nagadumili sa pagbutang sang ngalan kag hulagway sang mga opisyal sa mga proyekto nga ginapondohan sang gobyerno.
Ginadirektahan ang tanan nga may kaangtanan nga mga opisyal kag empleyado nga ipatuman dayon ang pagtanggal kag pagpanubo sang mga materyales nga indi naga-angot sa patakaran. Ang mga puno sang opisina ang may responsibilidad sa husto kag madali nga pagsunod, lakip na ang pagpaabot sang direktiba sa tanan nga yunit sa idalom sang ila pagdumalahan.
Gindumdum man sang DILG ang panawagan ni Presidente Ferdinand Marcos Jr. nga panatilihon ang mga proyekto sang gobyerno nga wala sang politikal nga pagpabutyag sang kaugalingon kag personality branding, kag ginaganyat ang mga pumuluyo nga magreport sang mga paglapas sa Anti-Epal policy.
