Kinahanglan na nga mapadasig ang pagpasar kag pagpatuman sang Anti-Political Dynasty Law sandig sa probisyon sang Konstitusyon nga nagahatag sang mandato nga i-regulate ang political dynasties sa pungsod.
Sa interview sang Bombo Radyo kay Mr. Danilo Arao, convenor sang Kontra Daya, iya ginpahayag nga kapin 39 na ka tuig ang ginahulat sang publiko para sa pagpasar sang nasambit nga layi nga magaregulate sa pagdumala sang mga political clan sa gobyerno.
Suno kay Arao, nagdugay sang pila ka dekada ang pagproseso sang Anti-Political Dynasty Law bangud, suno sa iya, posible nga gina-delay ini sang pila sa mga yara sa poder ukon may interes sa pagpabilin sang ila mga pamilya sa mga posisyon sa gobyerno.
Pahayag pa niya, tion na nga mangin patas ang election process para sa tanan nga luyag magpadalagan sa pwesto kag indi lamang mapaboran ang isa ukon duha ka political clan.
Nagalaum man ang natungdan nga mangin prayoridad sang Kongreso ang pagpasar sang Anti-Political Dynasty Law agud matuman ang mandato sang Konstitusyon kag mapalapad ang oportunidad sang iban nga kandidato nga makaserbisyo sa publiko.
