ROXAS CITY – Una na nga napatuman sang Roxas City Integrated Transport Terminal (RCITT), Pueblo de Panay, Roxas City ang Anti-smoking kag Anti-littering sa lugar.
Ini ang nangin pahayag ni Mr. Victor Arcenas Terminal Administrador sang ma-interview sang Bombo Radyo.
Suno kay Arcenas, antes pa man nagpatuman ang syudad sang ordinansa nga nagadumili sa pagpanigarilyo kag paghaboy sang basura sa pampubliko nga lugar, una na nila ini nga ginpatuman sa amu nga terminal.
Ginpahayag man sang administrador nga isa ka beses lamang nagpadulong ang katapo sang CORE unit sa terminal agud magtsekyar apang, isa lamang ang ila nadakpan kag yara ini sa guha sa diin indi na sakop sang pampubliko nga lugar.
Panugyan sini, nga kun tani antes magpatigayon sang pagpangdakop sa terminal makig-angut sa iya opisina agud ipahibalo kun sa diin lamang kutob ang sakop sang pampubliko nga lugar kag indi bangud santo sa ordinansa, pampubliko lamang nga lugar ang sakop sini kag indi ang pribado.
Ginklaro man ni Arcenas nga may yara sang mga gindisegnar nga mga lugar para sa pagpanigarilyo ang tagsa ka mga establisyemento sa lugar, subong man mga basurahan.
