Nadakpan ang anum ka indibidwal nga nagapatigayon sang ginaalegar ‘timing’ ukon iligal nga pagpangisda sa kadagatan nga sakop sang Barangay Basiao, Ivisan, Capiz.
Base sa nakuha nga impormasyon nagikan sa Ivisan Municipal Police Station, ginkilala ang mga nadakpan nga sanday alyas “Jun-Jun”, 38-anyos, kag “Rey Arro”, 24-anyos ,lunsay mga boat captain, kag ang ila mga crew nga sanday alyas “Ivan”, 45-anyos, “Rey”, 32-anyos, “Ricardo”, 54-anyos, kag “Wendel”, 40-anyos, nga lunsay mga residente sang Punta Barra, Roxas City, Capiz.
Nakumpiskar sa mga suspek ang duha (2) ka yunit sang motor banca nga nagabalor sang ₱24,000, mga fishing gear nga nagabalor sang ₱6,000, kag mas menos 17 kilo sang alimangon nga ginabulubanta nagabalor sang ₱3,000.
Magapangatubang ang mga nadakpan sa kaso nga paglapas sa Municipal Fisheries Code of 2012 (Ordinance No. 3, Series of 2012). Sa karon, yara na sa Ivisan Municipal Agriculture Office ang mga nakumpiskar nga kagamitan, samtang yara naman sa kustodiya sang Ivisan PNP ang mga nadakpan para sa nagakaigo nga proseso kag disposisyon.
