Ginkumpirma sang Ministry of Interior sang Qatar nga anum na ang patay matapos nga nag-crash ang isa ka helicopter sa Qatar territorial waters.
Suno sa mga otoridad, narekober sang search and rescue team ang bangkay sang anum sa pito ka sakay sang helicopter, samtang nagapadayon ang intensive operations agud pangitaon ang isa pa ka missing.
Una na nga ginpahayag sang Ministry of Defense sang Qatar nga posible may technical fault ang helicopter kag ginklaro nga wala sang indikasyon sang pag-atake sa sini kag indi pa sigurado kun iya sang militar ukon pribado nga indibidwal ang nag-crash nga helicopter.
Samtang, ini ang una nga ginreport nga insidente may kaangtanan sa aviation sa Qatar sa tunga sang nagapadayon nga giyera sa Middle East.
Padayon pa ang imbestigasyon sa nasambit nga insidente samtang ginahulat pa ang dugang nga detalye gikan sa mga otoridad.
