Arestado ang anum ka mga indibidwal sang mga katapo sang National Bureau of Investigation matapos ginapahayag gintuyo nga manipulahon ang vote-counting machines agud magdaog ang isa ka kandidato sa pagka-Mayor sa Iba, Zambales.
Ang mga nagkaladakpan amu sanday Roland Ucab, Teody Abalos, Joseph Ong, Cherrylyn Adriano, Ralp Edward Salas, kag Francis James Mapua.
Pinaagi sa ginkasa nga entrapment operation sang NBI sa isa ka hotel sa Quezon sang Mayo 8, natigayon nga naaresto ang mga ini.
Sa impormasyon nga nakuha sang Bombo Radyo, ginapahayag ang mga suspek ang ginpang-aresto matapos nga ginsugid sang isa ka kandidato sa pagka-Mayor sa amu nga lugar nga si Atty. Genaro Montefalcon nga ginganyat sya sang grupo nga manipulahon sang mga ini ang resulta sang eleksyon para siya ang i-deklarar nga daog.
Sandig sa imbestigasyon sang NBI, nagpalapit kay Montefalcon sanday Teody Abalos kag Cherrylyn Adriano sang tinalikdan nga bulan sang Abril kun sa diin ginpahayag sini nga may koneksyon ang mga ini sa sulod sang COMELEC kag ginsiguro nga magadaog ini sa eleksyon kabaylo sang P30 milyon.
Nagpakilala man si Abalos nga gumangkon ini sang senatorial candidate nga si anay DILG Secretary Benhur Abalos kag apo sang dati nga Comelec chairman nga si Benjamin Abalos.
Agud nga madakop ang mga suspek, nagpatigayon sang operasyon ang NBI Special Task Force.
Nahibaluan nga nagpangayo ang mga suspek sang down payment nga P15 million kag sang tion nga nabaton ini nila nga marked money, didto kag natigayon nga nagkaladakpan sang mga katapo sang NBI ang mga suspek.
Sa karon, nagapangatubang sa patung-patong nga mga kaso kalakip na ang estafa, usurpation of authority, kag paglapas sa Automated Election System Law.
