Padayon nga nagalala ang kinagamo sa Iran sa ikalima nga adlaw sang hublag-protesta batok sa nagataas nga gasto sa pagpangabuhi kag pagnubo sang balor sang kuwarta sang pungsod.
Suno sa report, duha ang napatay sa syudad sang Lordegan sa southwestern nga bahin sang Iran kag tatlo ang napatay sa syudad sang Azna kag isa pa sa Kouhdasht.
Magluwas diri, may mga tawo man nga ginpahayag napatay sa nagapadayon nga inaway sa tunga sang mga raliyista kag security forces sa nagkalain-lain nga mga syudad sa western part sang Iran.
Nahibaluan nga nag-umpisa ang protesta matapos ang hinali nga pagnubo sang balor sang Iranian currency batuk sa US dollar nga gintunaan sang protesta sang mga negosyante nga naakig sa panibag-o nga pagnubo sang balor sang ila currency.
Bilang sabat, ginsirado sang mga otoridad ang mga eskwelahan, unibersidad, kag mga pampubliko nga institusyon sa bug-os nga pungsod pagkatapos nga nagdeklarar sang bank holiday.
Suno kay Iranian President Masoud Pezeshkian, handa ang iya administrasyon nga pamatian ang mga lehitimo nga reklamo sang mga protesters. Apang, nagpaandam si Prosecutor General Mohammad Movahedi-Azad nga ang bisan ano nga pagtinguha nga magtuga sang kinagamo magaatubang sang mabug-at nga silot.
