ROXAS CITY – Dakop sa akto ang anum tanan ka mga persona nga nagapatigayon sang ‘tumbo’ isa ka iligal nga pagsugal sa Poblacion Proper, Mambusao, Capiz, alas-10:50 sang gab-i, Setyembre 12.
Pinaagi sa gintingub nga puwersa sang katapo sang Mambusao MPS kag 2nd Provincial Mobile Force Company (PMFC) natigayon nga madakpan sanday: Alejandro Lobo Diestro, 61-anyos, tagpatigayon sang pasugal, residente sang Poblacion Proper, sa amu nga banwa; Dedion Alinzorin Potato, 51-anyos, nagaserbe collector, kag residente sang amu man nga barangay, subong man ang mga nagataya nga sanday: Dande Degallado Caporal, 43-anyos sang Pob. Proper, Mambusao, Capiz, Roden Kapunan Potato, 55-anyos sang Pob. Tabuc, Mambusao, MarkEdes Lastrilla, 39-anyos, tricycle driver kag taga- Pob. Proper, Mambusao kag si Roland Dimaala Zulueta, 45-anyos residente sang Pob. Tabuc, sa amu man nga banwa.
Sa pagpakig-angut sang Bombo Radyo kay PMaj. Edwin B. Luces, OIC sang Mambusao MPS, ginpatigayon ang operasyon matapos ang report nga masami nagapatigayon sang pagsugal sa amu nga lugar, apisar nga wala sang namatyan.
Nakuha sa lugar ang improvised block cement table ukon ‘tumboan’ 3 ka coins, sponge kag chalks, kuwarta nagikan sa anum ka mga persona nga sanday Diestro – P2,601; Potato – P2400; Caporal – P425; Roden Potato – P360; Lastrilla – P1,560 kag Zulueta – P250, sa nagkalain-lain nga denominasyon.
Ginlapas sang mga ini ang Presidential Decree 1602 ukon ‘Anti-illegal gambling.’
Sa karon, nagapabilin ang mga ini sa Mambusao MPS, para sa nagakaigo nga disposisyon.
