Indi maka-join ang mga candidates gikan sa Malaysia, Singapore, Thailand, Vietnam, Indonesia kag Laos sa 75th Miss Universe nga pagahiwaton sa Puerto Rico sa Nobyembre 24 matapos nga gindeklarar sang Miss Universe Organization (MUO) nga indi kwalipikado ang amo nga mga pungsod.
Ang nasambit nga desisyon ang nag-ugat sa indi pagkilala sang MUO sa franchise agreements nga ginhimo paagi sa Miss Universe Eastern Pte. Ltd., nga ginapangunahan ni Nawat Itsaragrisil. Ginpanindugan sang kompaniya nga may kinamatarong ini nga magpadala sang mga kandidato halin sa anum ka pungsod.
Nagpabutyag sang pagkadismaya ang Miss Universe Malaysia 2026 Eunice Wong, Miss Universe Singapore 2026 Vion Erico Tan kag Miss Universe Thailand 2026 Tharina Botes sa wala kasiguraduhan sang ila partisipasyon.
Apang nagpabilin nga positibo ang tatlo kag nagpasalig nga indi sila mag-untat sa ila mga handum sa pihak sang wala ginalauman nga mga pagbag-o sa ila pagpanglakaton padulong sa beauty pageant.
