Ginakasubo sang mga Mexican fans ang trahedya sa Mexico City matapos nga apat ka indibidwal ang napatay kasunod sang pagdaog sang Mexico kontra Ecuador sa Round of 32 sang FIFA World Cup 2026.
Suno kay Bombo Ivan Marino, international correspondent sa Mexico, nagtililipon ang kapin isa ka milyon ka supporters sa palibot sang Angel of Independence kag Paseo de la Reforma agud magsinadya sa makasaysayan nga kadalag-an sang Mexico nga nakasulod sa Round of 16 sa una nga tion sa sulod sang 40 ka tuig.
Apang sa tuman kadamo sang tawo, nagluntad ang pagdinaguso sa pila ka bahin sang venue nga nagresulta sa pagkamatay sang tatlo ka indibidwal tungod sa asphyxiation ukon kakulang sang hangin bangud sang pagsiksikan.
Pahayag pa niya, nagpakig-unong man ang mga opisyal sang Mexico City sa pamilya sang mga biktima kag ginpasalig nga himuon ang mas mabaskog nga seguridad kag crowd control antes ang masunod nga match sang Mexico sa Round of 16.
Samtang, padayon ang imbestigasyon sang mga otoridad, ginapanawagan nila ang publiko nga magsinadya sa responsable nga pamaagi agud malikawan ang kapareho nga trahedya sa masunod nga mga hampang sang FIFA World Cup.
