ROXAS CITY – Na-rescue sang Philippine Coast Guard Station Capiz ang apat (4) ka mangingisda nga nagapautaw-utaw sakay sa ila sakayan sa baybayon sang Culasi kahapon nga adlaw.
Sa interview sang Bombo Radyo kay Coast Guard Station Commander Deputy Station Commander Arnel Nisola nakabaton sila sang report nagikan sa Coast Guard Station Mandaon, Masbate nga may may apat (4) ka mangingisda nga missing sakay sa motor banca nga MBCA John Delmar.
Gilayon nga ginmanduan sang Coast Guard Station-Capiz ang Coast Guard Sub-Stations sa Banica, Olotayan kag Libas nga magpatigayon sang joint SAR operations sa nasambit nga vicinity.
Madinalag-on nga naluwas sang mga tinawo sang Coast Guard Sub-station Libas ang nadula nga apat ka mga mangingisda sa vicinity waters nga ginabanta 5 nautical miles west sang Culasi Point nga yara sa maayo nga kondisyon kag ang distressed motor banca ang masunod nga ginguyod padulong sa Libas Fishport, Brgy. Libas syudad sang Roxas, Capiz.
Dugang pa sini, ang nasambit nga motor banca sakay ang apat ka mangingisda ang naglabay sa nasambit nga vicinity kag wala ginalauman nga nag-malfunction ang ila transmission system nga nagresulta sa pagkapatay sang ila sakayan.
Sa karon nakapauli na ang apat ka mangingisda sa ila tagsa ka panimalay.
