Arestado ang apat ka indibidwal sa iligal gambling operation ukon kilala sa sugal nga “Cara y Cruz” sa Barangay San Antonio, Tapaz Capiz.
Ang mga nadakpan amo sanday alyas ‘Tagor’, 63-anyos, sang Brgy. Poblacion, Tapaz Capiz alyas Jan-jan, 31- anyos, sang Brgy. San Pedro, alyas John, 20-anyos, sang Brgy. San Antonio, kag alyas Paul, 21-anyos sang Brgy. Taslan , Tapaz Capiz.
Sa interview sang Bombo Radyo kay Police Major Gregg Anthony V. Salbang, Officer in Charge sang Tapaz PNP, iya ginpahayag nga narekober sa operasyon ang sensilyo nga ginagamit sa hampang nga “Cara y Cruz,” kwarta nga ginapatihan nga bet money nga nagabalor sang P2,425, kag isa ka lamesa nga ginagamit sa iligal nga aktibidad.
Suno kay Salbang, nadakpan ang apat ka mga indibidwal sa akto samtang nagapatigayon sang iligal nga hampang nga “Cara y Cruz,” kag gilayon sila nga gin-aresto sang mga operatiba.
Pahayag pa niya ang tanan nga narekober nga ebidensya kag ang mga nadakpan yara na sa kustodiya sang Tapaz Municipal Police Station agud sa husto nga dokumentasyon kag pagpasaka sang kaso batok sa ila.
Kaso sa paglapas sang Presidential Decree No. 1602 ukon “Anti Illegal Gambling Law” ang pagaatubangon sang mga nagkadakpan.
