Apat ka nagkalain-lain nga insidente ang na-record sa Barangay Cagay, Roxas City sa sulod lamang sang isa ka adlaw, nga kalabanan ang may kaangtanan sa mga persona nga yara sa impluwensya sang makahulubog nga ilimnon.
Sa interview sang Bombo Radyo kay Barangay Kagawad Isidro Aragon, iya ginpahayag nga isa sa mga insidente ang may kaangtanan sa isa ka motorista nga natumba samtang nagabiyahe sa Cagay Highway.
May yara man sang mga pumuluyo nga nagkinagamo bangud sa wala pag-intindihanay, nga nagresulta sa pag-inaway sang mga ini.
Ginpahayag nga kadam-an sa mga insidente ang ginapatihan nga may kaangtanan sa sobra nga pag-inom sang makahulubog nga ilimnon, nga mahimo mangin kabangdanan sang aksidente kag pagkinagamo.
Bangud sini, ginapanawagan sang natungdan ang mga pumuluyo nga maglikaw sa sobra nga pag-inom sang makahulubog nga ilimnon, magpabilin nga responsable kag likawan ang pagpangita sang away agud malikawan ang mga insidente nga mahimo magbutang sa peligro sang ila kabuhi kag seguridad sang iban.
