ROXAS CITY-Pilas ang naangkon sang apat ka persona matapos nagbungguanay ang duha ka motorsiklo sa Bgry. Sto. Niño, Dumalag, Capiz.
Ginkilala ang driver sang isa ka motorsiklo nga si alyas Carl, 22-anyos, samtang ang tatlo naman ka persona nga sakay sang isa ka motorsiklo ang ginkilala kay alyas Mar, driver, 56-anyos, residente sang Masbate kag mga backrider sini nga si alyas “Ivan” kag alyas “Jun”.
Sa impormasyon nga nakuha sang Bombo Radyo nagikan sa Dumalag Municipal Police Station (MPS), samtang ginasubay ni Carl ang dalanon sakay sa iya motorsiklo nagikan sa Poblacion, Dumalag padulong kuntani sa banwa sang Cuartero, ginpahayag nga gulpi lang ini nga ginbungguan sang nagasunod nga motorsiklo nga ginamaneho ni alyas Mar. Rason nga nagkalatumpilak kag nag-angkon sang kapilasan sa nagkalain-lain nga bahin sang ila kalawasan ang driver sang Smash kag 3 ka rider sang Bajaj.
Gilayon naman nga ginrespondihan sang katapo sang Dumalag Emergency Response Team ang mga nagkalapilasan antes ini ginpadangat sa malapit nga ospital para sa nagakaigo nga pagbulong.
Sa karon, yara na sa istabli nga kondisyon ang mga nasambit nga persona sa naangkon nga pilas sa ila lawas.
