ROXAS CITY – Ginpahayag sang Capiz Provincial Agrarian Reform Officer (PARO) nga mahimo matandog kag magpadayon sa pagkultibo ang mga Agrarian Reform Beneficiaries (ARB’s) sang duta nga gin-award sa ila sang gobyerno.
Ini ang nangin pahayag ni Mr. Anthony Arostique, PARO II, may kaangtanan sa panibag-o nga kinagamo nga nagluntad sa tunga sang ARB’s kag tinawo ni Punong Barangay Ferdinand Bacanto, sa Barangay Dulangan, Pilar, Capiz, sang mainterview sang Bombo Radyo.
Matandaan nga gindumilian sang administrador sang pamilya ni Nemecio Tan nga si Brgy. Kapitan Bacanto, nga magpatindog sang payag ang mga ARB’s sa amu nga duta.
Suno kay Bacanto, indi sini luyag nga pahamtangan sang payag ang duta bangud posible sa ulihi mangin balay ini, apisar nga indi pa sa ila ang duta bangud wala pa sang desisyon ang Korte Suprema.
Suno naman kay Arostique nga sandig sa layi, indi mangin upang sa mga ARB’s nga magtandog sa duta ang pending nga kaso batuk sa pamilya Tan, gani mahimo gid sila makapatindog sang payag nga mangin serbe palahuwayan sa nagatrabaho sa amu nga duta.
Dugang pa sini, ang vested right ang magakadto sa ARB nagikan sa former land owner sa tion nga gin-isyuhan na ini sang Certificate of Land Ownership Award (CLOA) sang gobyerno.
Matandaan nga sang bulan sang Marso sang nagligad nga tuig, personal nga gin-turnover ni former DAR sec. John Castriciones ang CLOA sa mga ARB’s sa nasambit nga lugar.
