Archdiocese of Capiz nagpaguwa sang official statement sa pagpalupok sang armas sang isa ka pari

ROXAS CITY – Nagpaguwa sang official statement ang Archdiocese of Capiz kasunod sang ginadalahigan nga kontrobersiya ni Father Federico Lim Jr., sang Our Lady of Snows sa banwa sang Dumarao nga naghatag sang pagkabalaka sa publiko.
Ba-se sa official statement sang arsobispo sang Capiz nga ginbasa ni Father Jose Arturo Emilio Arbatin, social communications director sang Archdiocese of Capiz kag kura paroko sang St. Catherine of Alexandria sang banwa sang Mambusao nga ginkasubo sang Simbahan ang nahinabo nga insedente nga gindalahigan sang isa ka pari.
Ginpasiguro man sa mga tumuloo nga ginrespeto kag magasunod sa laye kag legal nga proseso ang Simbahan.
Magapatigayon man sang canonical procedure para maimbestigahan ang insedente.
Nag-apelar man ang ang Simbahan sa mga tumuloo nga buligan sila na pangamuyuan ang mga kaparian.
Samtang agud mapadayon ang mga aktibidad kag programa sang Simbahan ginpahamtang nga administrador sang Our Lady of Snows parish si Father Robert Alba samtang wala pa nakabalik si Father Lim Jr., bangud sa kaso nga paglapas sa RA 10591 ukon illegal possession of unlicensed firearms nga gingamit sini sa pagpalupok.