ROXAS CITY – Ginpatpat sang tagpamaba sang Archdiocese of Capiz kag team moderator sang St. Catherine of Alexandria sa banwa sang Mambusao ang kaundan sang ginpapanaog nga Circular No. 7, series of 2020 nga ginpapanaog sang Arsobispo sang probinsiya.
Suno kay Rev. Fr. Jose Arturo Emilio Arbatin, ang nasambit nga direktiba ang nagapaiway sang tanan nga religious gatherings sa mga Simbahan epektibo sadtong Marso 18, 2020 kag magalawig tubtob sa Abril 17, 2020.
Ang nasambit nga lihok ang kasunod sang pamahog sang coronavirus disease (COVID-19).
Nasaad diri nga kanselado na kag wala ginapahanugotan ang mga misa sa mga kapistahan sa parokya, mission stations, kag mga kapilya; mga prusisyon, recollections, kag pilgrimages; Baccalaureate ukon Graduation Masses; House blessings kag iban pa nga sacramentals; Parish Baptisms ukon Pagbunyag apang ahimo pahanugotan ang individual baptism sa baylo limitado lamang sa mga ginikanan kag tubtob sa duha ka mga maninoy ang makatambong; ang kasal sa simbahan ang mahimo man pahanugotan apang kinahanglan nga limitado gid lamang ang mga bisita; ang misa sa lubong ang mahimo nga mapatigayon ang funeral blessings sa balay ukon punerarya apang magsunod lamang sa nagakaigo nga mga protocols; kag pagpakalawat sa mga masakiton pinaagi sa mga Extraordinary Ministers of Communion.
Suspendido naman ang pagpakumpisar kalakip na ang paghatag sang General Absolution; nakadepende naman sa isa ka pari ang pagpakumpisar sa tumuluo nga nagapalapit sa iya agud magkumpisar.
Ginapahanugotan pa ang Annointing of the Sick kag Viaticum apang gina-abisohan ang mga pari nga maghimo sang precautionary measures.
Magapabilin nga bukas ang mga simbahan kag kapilya halin alas-6:00 sa aga tubtob alas-6:00 sa gab-i kun wala sang private liturgical celebration nga ginapatigayon apang magasirado ang mga Adoration Chapels.
Tanan nga mga liturgical celebrations sa Semana Santa ang patigayunon nga wala na ang pisikal nga presensiya sang mga tumuluo.
Magaselebrar sang misa nga pribado ang mga kaparian isa ka beses sa isa ka adlaw nga wala na sang magtambong nga tumuluo.
Temporaryo nga malibre ang mga tumuluo sa ila obligasyon nga magsimba kun Dominggo kag sa tanan nga Holy Days of Obligation tubtob sa Abril 17, 2020.
Magtinir lamang ang mga tumuluo sa ila balay kag magpangamuyo samtang nagasunod sa liturgical celebrations pinaagi sa radyo kag sa live streaming pinaagi sa Facebook kag sa tion sang pagpangalawat sa misa, pangamuyuon ang Act of Spiritual Communion.
Ginapangabay ang mga tumuluo nga magpuasa pinaagi sa pagpaiway sa pagpadulong sa simbahan kag pasangkaron ang spiritual communion sa iban pa nga mga katapo sang simbahan.
Nagpangabay man ini nga padayunon ang pagpangamuyo sang Oratio Imperata batuk sa COVID-19.
Nagpanawagan man ini sa mga tumuluo nga magpangamuyo sang Santo Rosaryo tagsa ka alas 9 sang gab-i kasunod man sang pangabay sang mismo Santo Papa.
