ROXAS CITY – Nagpaathag ang Archdiocese of Capiz natuhoy sa ipatuman nga pagsulundan sang Simbahan sa pagpabadlis sa Ash Wednesday sa Pebrero 26 ukon Miyerkules Badlis nga panugod sang Kuwaresma kadungan sang pamahog sang coronavirus disease (COVID-19) sa pungsod.
Suno kay Vicar General Monsignor Cyril Villareal, sandig sa ginpapanaog nga pagsulundan sang Catholic Bishops Conference of the Philippines (CBCP), sa baylo nga paghitan sang abo ang agtang sang isa ka tumuluo, igabudbod na lamang ang abo sa iya nga alimpulos.
Ginklaro ni Villareal nga sa baylo nga basa nga abo ang gamiton, mamala nga abo ang igabudbud sa isa ka tumuluo nga luyag magpabadlis.
Bangud sa nasambit nga mga pagbag-o, gin-athag ni Villareal nga wala ini sang kinalain sa nakaandan nga pagbutang sang abo sa agtang.
Ginpahanumdom man sini nga ang Ash Wednesday ang panugod sang Kuwaresma nga isa ka debosyon kag obligasyon nga dapat himuon sang mga nagapati sa ebanghelyo sang Diyos.
Matandaan nga una na nga nagpapanaog sang pagsulundan ang CBCP natuhoy sa pila ka mga pagbag-o sa aktibidad sang Simbahan bangud sang pamahog sang COVID-19.
Kalakip diri ang temporaryo nga pagdumili sang paghawiray sang kamot sa pag-amba sang Amay Namon ukon Our Father; pagdaho sang ‘ostia’ sa nagapangalawat; paglikaw sa beso-beso ukon paglamano sa pagtamyaw sang ‘peace be with you’; kag temporaryo nga indi pagpahamtang sang ‘agua bendita’ ukon ‘holy water’ sa bukana sang mga Simbahan.
