Nagpalab-ot sang pagpanginbulahan ang Archdiocese of Capiz sa Episcopal Ordination, Canonical Possession kag Solemn Installation ni Most Rev. Cyril Villareal bilang ika-5 nga Obispo sang Diocese of Kalibo.
Sa interview sang Bombo Radyo kay Very Rev. Msgr. Rufino Regie Pamposa, Vicar General sang Archdiocese of Capiz, iya ginpahayag nga ang pag-orden kag pag-instalar kay Bishop Villareal nagasimbolo sang bag-o nga kapitulo sang pagdumala kag pagpalapnag sang misyon sang Simbahan sa probinsya.
Suno kay Pamposa, ang isa ka Obispo ang may yara sang daku nga responsibilidad sa pagdumala sang Diocese, pagpatuman sang pastoral nga mga programa nga nagasabat sa kinahanglanon sang komunidad, kag nagahatag sang direksyon ilabi na sa pag-atubang sang nagkalain-lain nga social kag moral nga mga isyu.
Pahayag pa niya, ang amo nga kahiwatan ang ginpangunahan sanday Most Rev. Victor B. Bendico, D.D., Arsobispo sang Capiz, Most Rev. Narciso V. Abellana, D.D., sang Romblon, Most Rev. Jose Corazon T. Tala-oc, D.D., Bishop-emeritus sang Kalibo kag ni His Eminence Jose F. Cardinal Advincula sang Manila.
Matandaan nga sang Enero 24, gin-appoint ni Pope Leo XIV si Bishop-elect Villareal bilang Obispo sang Kalibo, nga nagapabilin nga sede vacante halin Hunyo 2025 pagkatapos ginbaton sang Santo Papa ang pagretiro ni Bishop Tala-oc.
