ROXAS CITY -Nagpamalibad ang Archdiocese of Capiz sa ginahinyo sang provincial government nga gamiton nga quarantine facility para sa mga asymptomatic patients ang Sancta Maria Mater Et Regina ukon ang Cagay Seminary sa Barangay Cagay, Roxas City.
Ini ang ginkompirmar ni Rev. Fr. Emilio Arbatin, pinuno sang Commission on Social Communications and Mass Media sang Archdiocese of Capiz sang mainterview sang Bombo Radyo.
Ginpahayag ni Arbatin nga nabaton na sang ni Archbishop Jose Advincula Jr., ang sulat gikan sa provincial government nga ginahinyo nga gamiton bilang quarantine facility ang nasambit nga seminaryo sa nasambit nga barangay.
Apang, suno kay Arbatin nga nagpamalibad ang arsobispo nga usaron ang nasambit nga seminaryo bangud nagapadayon pa ang pagpakaayo sa nasambit nga pasilidad matapos nga ginhalitan sang Bagyong Ursula.
Magluwas diri, ginapreparar naman ini para gamiton sa flexible learning system sang Commission on Higher Education (CHED).
Samtang, gintanyag naman sang Archdiocese of Capiz ang CPC Calipayan Campus sa Barangay Punta Tabuc, sining siyudad bangud indi pa man ini pag-usaron sang nasambit nga kolehiyo sa sulod sang isa ka tuig.
Gin-athag naman ni Arbatin nga naintiendihan sang Archdiocese ang pagtamdanay kag pagbinuligay subong nga pandemiya apang subong indi pa available ang nasambit nga seminaryo
