Magaselebrar sang 50th anniversary ang Archdiocese sang Capiz subong nga adlaw.
Sa interview sang Bombo Radyo kay Msgr. Rufino Regie Pamposa, Vicar General sang Archdiocese sang Capiz, iya ginpahayag nga may yara sang mga aktibidad ukon hilikuton nga pagahiwaton kaangay sang prusisyon nga magasugod sa 71 ka mga Parokya kag mission station sa bug-os nga Archdiocese sang Capiz.
Suno kay Pamposa, may yara sang mga delegation, mga parokyano, kag mga tumuluo nga maaga pa nga magahalin sa tagsa nila ka mga Parokya agud makatambong sa pagahiwaton nga prusisyon.
Magluwas sa mga tumuluo kag mga parokyano, magaupod man ang Esduyante, mga madre, mga semenarista kag 71 ka mga pare sa nagkalain-lain nga Parokya sa probinsya sang Capiz.
Ang prusisyon ang magasugod halin sa Colegio dela Purisima Concepcion Boulevard Campus padulong sa Cathedral kag may yara sang misa nga pagahiwaton nga pagapangunahan sang arsobispo nga si Most Rev. Victor Barnuevo Bendico.
Sa pagahiwaton nga misa pagabasahon ang Indulhensya Plenaria, isa ka kahigayunan kag pribilihiyo nga ginahatag lang sang Vatican sa Rome para sa mga katoliko nga tumuluo.
Ini ang makuha sang isa ka tumuluo kon magatambong ini sa Misa sang Jubilee, matuod nga nagahinulsol san iya sini nga mga sala kag nagapasakop sa ma aktibidad nga may pagtuo kag paghigugma.
Ginapasiguro man sang Archdiocese sang Capiz nga ang selebrasyon sang Golden Jubilee magahatag sang oportunidad sa mga parokyano nga maghiliusa kag magpasalamat sa bugay sang Simbahan.
Sa pagpanguna ni Most Rev. Victor B. Bendico, Arzobispo sang Capiz, ginahingyo ang mga Katoliko nga magpadayon sa aktibo nga partisipasyon sa selebrasyon sang lokal nga Simbahan.
Ini nga selebrasyon magahatag sang oportunidad para mag-reflect sa espirituhanon nga pagtuo kag serbisyo sang Archdiocese sang Capiz sa nakaligad nga lima ka dekada.
