ROXAS CITY – Magatulak padulong sa Marawi City subong nga adlaw ang mga katapu sang Archdiocese sang Capiz para personal magdul-ong sa mga bakwit nga apektado sang padayun nga bakbakanay sang militar kag maute terror group.
Suno kay Capiz Archdiocesan Social Action Center (CASAC) Director Rev. Fr. Mark Granflor, magapadulong sa Marawi City sini nga adlaw ang mga miyembro sang CASAC kag Capiz Archdiocesan Disaster Emergency Reponders (CADER) dala ang mga food packs, hygiene kits, psychosocial kits, wheelchairs kag mga hampanganan para sa mga bata.
Magadiretso ang grupo sa banwa sang Balo-i, Lanao Del Norte sa diin temporaryo nga nagatenir ang kadam-an sa mga bakwit matapos nag-evacuate kasunod sang krisis sa Marawi City.
Tuman naman ang pagpasalamat sang Simbahan Katolika sa mga Capizeño sa bulig nga ginpalab-ot sa mga bakwit nga apektado sang krisis sa nasambit nga syudad.
