ROXAS CITY, CAPIZ- Padayon sa karon nga ginadihon sang mga opisyal sang Barangay Balijuagan, Roxas City ang plano nga pagguba sang arko nga ginpahamtang sa boundary sang banwa sang Ivisan kag syudad sang Roxas.
Sa interview sang Bombo Radyo kay Punong Barangay Ronnel Fernando sang Barangay Balijuagan, Roxas City, iya ginpahayag nga ang desinyo sang amo nga arko, orihinal nga gindesinyo para lang sa two-lanes.
Suno kay Fernando, bangud nga ginpalapad kag nahimo na nga four-lanes ang karsada, nakasagabal na ang nasambit nga arko sa alagyan rason nga suno sa iya kinahanglan na ini nga gub-on bangud nga madamo na sang mga motorista ang nagakadisgrasya sa amo nga bahin.
Pahayag pa nya, igapasa nila ang isa ka resolusyon sa mga natungdan partikular ang 1st District Engineering Office sang Department of Public Works agud nga mahatagan sang nagakaigo nga igtalupangod ang amo nga arko.
Nagapanawagan si Fernando sa mga motorista nga maghalong kag basahon ang mga signages nga napahamtang sa amo nga bahin agud malikawan nga madisgrasya.
Interviewed by Bombo Jessa Mae De Los Santos
