Narekober sang mga otoridad ang mga armas-luthang kag ginaalegar nga droga sa ginpatuman nga search warrant sa Barangay San Nicolas, Tapaz, Capiz.
Ang arestado amo si alyas “Padyo,” 47-anyos, Isa ka negosyante samtang ang nagapabilin nga at-large amo si alyas “Badang,” 21-anyos nga lunsay mga residente sang nasambit nga lugar.
Sa interview sang Bombo Radyo Kay Police Major Gregg. Anthony Salbang, officer in charge sa Tapaz Municipal Police Station, iya ginpahayag nga naaresto ang individual sa gintingob nga operasyon sang mga katapo sang Tapaz Municipal Police Station, kag 604th Maneuver Company of the Regional Mobile Force Battalion 6 (RMFB6).
Nahibaluan nga Ang search warrant ang gin-isyu ni Hon. Rommel L. Leonor, Executive Judge sang Regional Trial Court (RTC), 6th Judicial Region, Branch 21, Mambusao, Capiz, nga napetsahan sang Setyembre 25, 2026.
Dugang pa, narekober man sa operasyon ang caliber .45 Norinco pistol, duha ka magazine kag 11 ka bala, isa ka 12-gauge long-barrel shotgun nga wala sang serial number kag may live round, isa ka shotshell, drug paraphernalia, digital weighing scale kag black pouch.
Nakumpiskar man ang anum ka sachet sang ginapatihan shabu nga may standard drug price nga P272,000.
Sa subong, yara na sa kustodiya sang Tapaz MPS ang nadakpan kag magapangatubang sang kaso nga paglapas sa Republic Act 10591 ukon Comprehensive Firearms and Ammunition Regulation Act kag Republic Act 9165 ukon Comprehensive Dangerous Drugs Act of 2002.
Samtang padayon naman ang pagpangita kay alyas “Badang” nga nagapabilin nga at-large.
