ROXAS CITY – Narekober sa ginluntaran sang engkwentro sa tunga sang Philippine Army 12th Infantry Division kag ginapatihan miyembro sang Communist Party of the Philippines-New People’s Army (CPP-NPA) ang mga armas-luthang kag mga bala sa Barangay Duran, Dumalag Capiz.
Sa interview sang Bombo Radyo kay 1st Lieutenant Dutch Herald Magon, Civil Operation Officer sang Philippine Army 12IB, ginsiling sini nga nakuha sa lugar ang isa ka homemade 12 gauge shotgun, 1 ka .45 caliber pistol, 2 ka anti-personnel mine, granada, 5 ka magazine sang M16 rifle, 2 ka magazine sang .45 caliber pistol, madamo pa nga bala kag bulong.
Suno diri, gilayon nga nagpatigayon sang security patrol ang Philippine Army kaupod ang mga katapo sang Philippine National Police matapos nga nakabaton sang impormasyon nagikan sa concerned citizen nga may yara sang presensya sang armado nga grupo sa lugar.
Pahayag pa sang opisyal, nga nasumalang sang hanay sang militar ang mga rebeldeng grupo kun sa diin nauna pa ang mga ini nga nagpaulan sang bala nga nagdugay sang kapin 5 ka minutos.
Wala naman sang narekord nga pilason sa bahin sang militar apang ginapatihan nga may casualty sa bahin sang mga rebelde matapos nakit-an ang mga tulo sang dugo sa lugar kun diin sila nakapwesto sang natabo ang engkwentro.
Padayon man ang pag-engganyo sang militar sa mga rebelde nga magbalik na sa sabak sang gobyerno.
