Gin-postpone sang Quezon City Regional Trial Court Branch 98 ang arraignment ni Vice President Sara Duterte sa kaso nga grave threats matapos magpasaka sang motion ang iya kampo.
Sang Agosto 21, nagpasaka ang kampo ni Duterte sang motion for certiorari kag prohibition batok sa mga information nga gin-file sa Quezon City court.
Ginpangabay man nila ang injunction sa mga kaso kag ideklarar ini nga indi valid.
Sang Setyembre 4, nag-file man ang kampo ni Duterte sang motion sa Supreme Court nga nagapangabay nga i-recall ukon bawion ang mga warrant of arrest.
Sang Huwebes, nag-file man sila sang urgent motion sa Supreme Court nga nagapangabay nga gilayon nga maresolbar ang iya application para sa temporary restraining order sa grave threats case batok sa iya.
Gin-updan si Duterte sang iya utod nga si Rep. Paolo Duterte sa diin nag-abot sila sa Quezon City Hall of Justice alas-8:30 sang aga.
Madasig lamang sila nga nangamusta sa ila mga supporters antes nagsulod sa korte.
Naghalin si Duterte sa Quezon City Hall of Justice alas-9:00 sang aga.
Nahibaluan nga nag-post sang bail ang Vice President sang Sabado, isa ka adlaw matapos nagpagwa ang korte sang warrant of arrest batok sa iya.
Matandaan nga sang Agosto 11, nag-file ang Department of Justice sang tatlo ka kaso nga grave threats batok kay Duterte may kaangtanan sa iya mga ginhambal sa isa ka online press conference sang 2024.
Sa amo nga press conference, nagsiling si Duterte nga nakigsugilanon na siya sa isa ka tawo agud ipapatay si President Ferdinand “Bongbong” Marcos Jr., First Lady Liza Araneta-Marcos, kag ang sadto anay House Speaker nga si Martin Romualdez kun may matabo sa iya.
