Nagahatag sang ligwa kag kinamatarong sa mga kababainhan ang Article 370 of the New Civil Code sa pagdesisyon sa pagbag-o sang apelyido.
Sa interview sang Bombo Radyo kay Atty. Edreilyn Dinero sang Integrated Bar of the Philippines-Capiz Chapter, iya ginpahayag nga pinasahi sini nga probisyon nga ang babayi may katungdanan nga magdesisyon kung ipadayon ang iya maiden name ukon gamiton ang apelyido sang iya bana sa legal nga dokumento.
Suno sa iya, indi mahimo ipilit sa babayi ang paggamit sang apelyido sang iya bana, kag ang desisyon sini mahimo gamiton sa mga dokumento pareho sang passport, birth certificate, kag iban pa nga opisyal nga papeles.
Pahayag pa niya, pwede nga baliskaron sang babayi ang desisyon basta sundon ang legal nga proseso para sa amendment sang opisyal nga dokumento.
Dugang pa sang natungdan, ang pagpili sang apelyido sang babayi indi lang personal nga desisyon, kundi isa ka pamaagi sang pagrespeto sa iya legal kag propesyonal nga identidad.
