Manubo ang tsansa nga makuha sang House prosecution panel ang kinahanglan nga 16 ka boto sang Senado agud ma-convict kag ma-impeach si Vice President Sara Duterte kon ang pagbasehan lang amo ang Article IV sang Articles of Impeachment sa alegasyon sang grave threat.
Sa interview sang Bombo Radyo kay Atty. Joenar Pueblo, President sang Philippine Arbitration Center in the Visayas, iya ginpahayag nga kun ang mga ginplastar lang nga ebidensya nga may kaangtanan sa Article IV kag wala pa sang dugang nga testimonya ukon iban pa nga ebidensya nga ipresentar sang House prosecution, lakip na ang mga pahayag sang mga opisyal sang National Bureau of Investigation, mabudlay nga makumbinsi ang 16 ka senador nga kinahanglan agud magresulta sa conviction.
Suno kay Pueblo, ang House prosecution ang may responsibilidad nga magpresentar sang mabaskog, igo kag kapani-paniwala nga ebidensya agud mapamatud-an ang mga alegasyon nga yara sa tagsa ka article of impeachment.
Dugang pa sang natungdan, ang desisyon sang mga senator-judges magadepende sa kabug-osan sang mga ebidensya kag testimonya nga ipresentar sa impeachment trial, kag indi lamang sa isa ka pahayag ukon isa ka testigo.
