Daku ang mabulig sang Artificial Insemination sa pagpadamu sang mga hinuptanan nga Carabao.
Sa interview sang Bombo Radyo kay Ronierix Dollete, isa ka Artificial Insemination Technician sang Capiz State University-Pontevedra Campus iya ginpahayag nga ang artificial insemination amo ang pamaagi sang pagpabusong sa isa ka sa sapat kaangay sang carabao nga wala nagaagi sa tradisyunal nga pagkasta.
Suno kay Dollete, masiguro ang manami nga lahi sang carabao ukon buffalo bangud nga makapili sang breed nga ipa-pair sa ila hinuptanan.
Pahayag pa niya, ang pagbusong sang isa ka carabao ang nagadugay sang 9 tubtob 11 ka bulan depende sa katigulangon.
Dugang pa sang natungdan, ang pagpadamu sang carabao ang maayo nga pamaagi indi lang sa pagpadaku sang kita kundi pagsuporta man sa dairy farming sa probinsya sang Capiz.
