ROXAS CITY – Ginpanginwala sang tiayon sang seafarer nga nagpositibo sa coronavirus disease (COVID-19) ang naglapta nga balita nga nakapauli pa sa ila balay ang bana antes nagguwa ang resulta sang real-time polymerase chain reaction (RT-PCR) test.
Ginpahayag ni Manang Rose nga bisan makadali lamang wala nakapauli sa ila balay ang bana bangud ginsugat ini sang ambulansiya sang Tapaz sa Iloilo kag nagdiretso sa quarantine facility sang Tapaz National Highschool.
Aminado ang ginang nga nagdul-ong lamang ini sang pagkaon sa facilidad apang wala gid nakapalapit sa bana bilang pagsunod man sa protocol.
Nahibaluan pa nga mismo ang ginang ang indi magpasugot nga magpauli sa ila balay ang bana bangud may menor de edad pa sila nga mga kabataan kag may upod nga senior citizen sa ila balay nga vulnerable sa COVID-19.
Samtang hugot naman nga ginapabantayan ni Kapitan Jorly Jimenez sang Barangay Switch, Tapaz ang pamilya sang seafarer agud indi sila makaguwa sa ila balay.
Suno sa punong barangay nga ginapaidalum sa home quarantine ang nasambit nga pamilya kag ginapabantayan sini sa mga barangay tanod.
