ROXAS CITY – Naglab-ot sa P40,000 ang nakuha sa asawa sang isa ka seaman sang ginapatihan miyembro sang Dugo Dugo gang.
Suno kay Mrs. Beverly Vigo sang Barangay Banica, Roxas City nagtawag sa ila nga balay ang lalaki nga nagpakilala nga konektado sa shipping company sang mister kag ginpahibalo sang malain nga natabo matapos nga nag-away kag napatay ang kapitan sang barko.
Sa kahadluk sang ginang wala nagsulod sa iya pinsar nga kumpirmahon ang balita sa kompanya sang mister kag nagpadala sang P40,000 sa ginasiling chief engineer nga si Niño Mendoza nfa kaupod sang mister sa isa ka ospital sa iban nga pungsod.
Wala nagdugay liwat nagtawag ang suspek kag nagapangayo sang P310,000 apang P85,000 lamang ang na-deposito sa banko.
Nagduda lamang ang ginang nga natuntuhan ini sang liwat magpangayo si Mendoza,
Bangud diri, gintawagan sini ang kompanya sang mister kag naghibaluan nga wala sang kamatuoran ang balita nga nakalab-ot sa iya.
Gilayon nga nagpadulong sa banko ang ginang kag maswerte nga nabawi ang gindeposito nga P85,000 apang wala na ang P40,000.
