CEBU, Philippines – Makasaysayon nga paghiwat sang ika-48 nga ASEAN Summit sa Cebu matapos gpag-anunsyo nga pagatalakayon ang una nga pag-amyenda sa ASEAN Charter sang ginpatuman sa tuig 2007.
Kabahin sa pagatalakayon sang mga lider sang Association of Southeast Asian Nations ukon ASEAN ang “Cebu Protocol to Amend the Charter of ASEAN”, nga isa sa tatlo ka importante nga dokumento nga suportahan sang Pilipinas sa pagpanguna ni Presidente Ferdinand Marcos Jr. sa summit sini nga semana.
Suno kay ASEAN spokesperson Dominic Xavier Imperial, ang protocol isa ka importante nga tikang agud mapalig-on ang institutional framework sang ASEAN kag suportahan ang full integration sang Timor-Leste bilang pinaka-bag-o nga miyembro sang rehiyonal nga grupo.
Ginalauman man nga aprobahan sang mga lider ang ASEAN Leaders’ Declaration on Maritime Cooperation nga nagatinguha mapalapad ang kooperasyon sa maritime security kag governance lakip ang plano nga himuon nga opisyal nga sectoral body ang ASEAN Coast Guard Forum kag pagtukod sang ASEAN Maritime Centre sa Pilipinas.
Lakip man sa pagatalakayon ang ASEAN Leaders’ Statement on the Response to the Middle East Crisis nga nagatuyo palig-onon ang koordinasyon sang mga miyembro bangod sang nagalala nga tensyon sa Middle East.
Samtang, ginpahayag ni Imperial nga padayon nga ginaprioridad sang ASEAN ang energy security, food security kag proteksyon sang mga ASEAN nationals bangod sang nagakadamo nga global uncertainties.
Nahibaluan nga sa Pilipinas ang 2026 ASEAN Summit kag Related Meetings nga may tema nga “Navigating Our Future, Together,” nga ginatamyaw nga isa ka importante nga hitabo para sa bug-os nga Southeast Asia.
