Nagpanawagan ang mga foreign ministers sang Association of Southeast Asian Nations (ASEAN) sa tanan nga partido nga respetuhon ang ceasefire agud indi na maglala pa ang kinagamo sa Middle East.
Sa isa ka tingub nga pahayag, ang rehiyonal nga bloke nagpabutyag sang kabalaka sa nagalala nga sitwasyon kag nagpabutyag man sang suporta sa mga pagtinguha nga ginahimo para sa kalinong sa rehiyon.
Ginpamatud-an man sang 10 ka katapo nga bloke ang ila pangako sa malinong nga paghusay sang mga diperensya kag sa pagtahod sa soberanya kag integridad sang teritoryo sang tanan nga pungsod.
Ginhatagan man pagtamod sang mga foreign ministers sang ASEAN nga ang tanan nga mga aksyon dapat magpabilin nga nagasanto sa internasyonal nga kasuguan kag sa United Nations Charter.
Nagpabutyag man sang suporta ang grupo sa internasyonal nga inisyatibo nga ginapangunahan sang United Nation nga nagatuyo sa pagpahagan-hagan sang tensyon kag pag-umpisa sang konstruktibo nga paghambalanay sa tunga sang mga nadalahig nga partido.
Nagpasalig ang ASEAN nga buligan ang mga pumuluyo nga apektado sang armadong inaway.
Ang pahayag ginhimo sang ASEAN kasunod sang bag-o lang ginpatuman nga ceasefire matapos ang ginatawag nga “12 day of war” sa tunga sang Israel kag Iran nga nagsugod sadtong Hunyo 13 sa diin masobra 600 ka tawo ang napatay sa bahin sang Iran kag 29 sa bahin sang Israel. Narekord man ang linibo ka mga pilason sa duha ka magkaribal nga pungsod.
