ROXAS CITY – Asphyxia due to aspiration, Ini ang resulta sang ginpatigayon nga autopsy ni Police Major Dr. Joe Martin Fuentes, medico legal officer sang Regional Crime laboratory sa bangkay sang soltero nga nauna gin-alegar napatay bangud ginyanggaw sang kaugalingon nga tiyo sa Barangay Balingasag, Cuartero, Capiz.
Ginpahayag ni Major Fuentes nakita sini nga nagdusngal ang bibig kag may bagras sa lawas ang biktima nga si Aljohn Apoldo.
Sa pagtsekyar sini sa lawas sang soltero, nakit-an ni Fuentes nga may foreign object nga nagsulod sa baga kag airways ukon alagyan sang hangin sang biktima nga gintunaan sang iya kamatayon.
Nagaguwa man sa imbestigasyon sang talatapan nga pwersa nga ginpakaon ukon ginpainum ang biktima kag posible nagtalang sa alagyan sang hangin
Bangud sa findings sang autopsy kasubong nga gintinluan na ang pangalan ni Kagawad Roger Agustin nga una ginakusahan nga nagyanggaw sa hinablos.
Suno kay Fuentes nga wala ini nagapati sa yanggaw labi na sa parte sang biktima, bangud ba-se sa pagpangusisa sini, na-admit sa ospital si Apoldo kag nagpaidalum pa ini sa psychiatric help matapos nga magkasunod nga napatay ang iya ginikanan.
Sa ini nga sitwasyon suno kay Fuentes nga indi malayo nga nagsuprer sang depresyon ang biktima.
