ROXAS CITY – Ginkasubo sang Simbahang Katolika ang asud-asud nga kaso sang suicide incidents sa probinsya sang Capiz.
Ini ang ginpahayag ni Rev. Father Jose Arturo Emilio Arbatin sang mainterview sang Bombo Radyo.
Suno kay Arbatin nga ginkaalarma sang Archdiocese of Capiz ang pagsaka sang numero sang mga indibidwal nga nagakomiter sang suicide rason nga naghimo sang tikang ang Simbahan pinaagi sa pagpaguwa sang pastoral letter agud liwat nga mapalab-ot sa mga tumuluo.
Nagpahanumdum man si Arbatin nga wala nagabag-o ang pagtulu-unhan sang Simbahan pag-abot sa isyu sang paghikog, sa diin isa ini ka daku nga sala.
Wala sang kinamatarung ang tawo nga utason ang kaugalingon nga kabuhi bangud ginpahulam lamang ini sang Diyos.
Apang sa pihak sini nagapati ang Simbahang Katolika nga posible nadulman lamang ini bangud sa problema nga nagaabot sa kabuhi.
Pila man sa mga rason sa pagpanginmatay sang tawo amo ang kakulang sang suporta gikan sa pamilya, pag-isahanon ukon pagdaug daug ukon bullying, problema sa personal nga kabuhi.
Nagpahanumdum man ini sa mga ginikanan nga hatagan sang atensyon kag iprayoridad ang mga kabataan agud mangin malapit sila sa isa kag isa kag indi pagdulaon ang pagtuo sa Ginuo.
