ROXAS CITY-Ginkompirmar sang pamunuan sang Hospital Management Services -HMS nga indi na pagpaidalom sa RT-PCR test ukon swab test ang mga Locally Stranded Individuals (LSI’s) kag Returning Overseas Filipinos (ROF’s) nga naga-abot sa probinsiya sang Capiz.
Ini ang ginkompirmar ni Dr. Ramon Alex Nolasco sang nainterview sang Bombo Radyo.
Suno kay Nolasco nga ang tanan nga mga LSI’s nga nagapauli sa probinsiya nga mga asymptomatic ukon wala sang may ginabatyag nga sintomas ang indi na kinahanglan pa nga magpaidlom sa swab test.
Apang gin-athag sini, nga magapaidalom sa gihapon sa istrikto nga 14 day quarantine sa mga quarantine facilities nga gindesignar sang LGU’s.//
Lunsay mga symptomatic gid lamang ang mahimo nga ipaidalom sa amo nga test.
Bangud sini, aminado si Nolasco nga nangin matawhay ang operasyon sang RT-PCR testing laboratory sa probinsiya.
Samtang magluwas sa mga LSI’s, ginklaro man sini nga ang mga High Risk Contacts nga wala sang may ginapabatyag nga sintomas ang indi na mahimo pa nga mag-ipadalom sa swab test.
Igarekomendar gid lamang suno sa iya nga magpaidalom sa 14 day home quarantine ang mga asymptomatic kag high risks contacts.
Mahibaluan nga ang nasambit nga pagsulundan ang sandig sa ginpaguwa nga panibag-o nga omnibus guidelines sang Department of Health (DOH) sang tinalikdan nga bulan sang Disyembre.
