Ginpahayag sang Department of the Interior and Local Government (DILG) nga ipatawag sang Criminal Investigation and Detection Group (CIDG) ang presidente sang Ateneo de Manila University bilang kabahin sang padayon nga imbestigasyon sa pagkapatay sang duha ka miyembro sang Ateneo men’s basketball team.
Suno sa mga otoridad, ginapalawig pa ang pag-usisa agud mahibaluan kon may kakulangan sa mga safety kag medical measures nga dapat kuntani ginpatuman sa tion sang team-building activity sa Aurora, kun sa diin nalunod kag napatay ang duha ka student-athletes nga sanday Rene Baterbonia kag Divine Adili.
Ginpahayag man sang CIDG nga may yara na sila sang pila ka persons of interest kag ginpapresentar na nila ang mga coach, manugdula kag iban pa nga may kahilabtanan sa insidente agud makahatag sang ila pahayag.
Samtang, ginapadayon sang mga imbestigador ang pagtipon sang ebidensya kag impormasyon agud mahibaluan kon may nalapakan nga kasuguan kag kun sin-o ang posible nga may responsibilidad sa natabo. Ginatamod man ang posibilidad sang iban nga kaso base sa resulta sang imbestigasyon.
