Igadul-ong na sa katapusan nga palahuwayan si Rene Baterbonia, isa ka Ateneo student-athlete kag kilala bilang Palarong Pambansa 2025 MVP nga napatay matapos malumos sa team building sa Aurora.
Suno sa pamilya ni Baterbonia, pagamisahan ini anay antes idul-ong sa iya katapusan nga palahuwayan sa Talacogon Memorial Park, Barangay Labnig, Talacogon, Ajusan del Sur, kon sa diin siya pa lang Ang una nga igalubong sa nasambit nga Memorial.
Ang pamilya, mga abyan, kag mga kaupod nga atleta ni Rene magatipon sa paghatag sang pasidungog sa iya nga nagdala sang kadungganan sa ila komunidad paagi sa iya pinasahi nga ikasarang sa atleta.
Dugang pa sang pamilya kag mga nakaupod nga basketbolista ni Rene Kilala siya bilang isa ka mapisan, disiplinado, kag mapainubuson nga atleta nga nagserbe nga inspirasyon sa madamo nga mga pamatan-on.
Ginalauman man nga magatambong sa iya lubong ang mga pumuluyo, lokal nga gobyerno, kag mga taga-suporta ni Baterbonia bilang katapusan nga paghatag sang pasidungog sa iya legasiya sa patag sang sports.
Nagapanawagan man ang pamilya ni Baterbonia sa nga staff sang Ateneo nga isugid kon ano ang matuod nga natabo sa team building agud man mahatagan sang hustisya ang pagkapatay sang ila anak nga kuntani madamu pa sang handom sa iya kabuhi kag sa ila nga pamilya.
