Ginbaton na sang negosyante nga si Atong Ang ang pormal nga pagpasaka sang panumbungon batuk sa iya may kaangtanan sa ginaalegar kahilabtanan sini sa kaso sang missing sabungeros.
Kasunod ini sang pagpasaka sang multiple counts of murder kag serious illegal detention cases batuk kay Ang kag sa iya mga kaupdanan sang pamilya sang mga nadula nga sabungero sadtong Sabado, Agosto 1.
Sa pahayag nga ginpaguwa pinaagi sa iya abogado nga si Atty. Gabriel Villareal, ginpahayag ni Ang nga handa siya nga atubangon ang mga alegasyon nga ginapalab-ot batuk sa iya sa nagakaigo nga legal forum.
Ginpabilin man ni Ang ang iya pagka-inosente kag nagpaandam batuk sa testimonya sang self-proclaimed whistleblower nga si Julie Patidongan ukon alyas Totoy nga iya ginlaragway nga flawed, self-interested kag wala sang ebidensya.
Suno sa iya, naka-level up si Patidongan halin sa pagkabahin sang robbery syndicate pakadto sa pagpadalagan sang iya kaugalingon nga criminal network kaangay sang illegal gambling, kidnapping, extortion, kag intimidation, gamit ang resources kag ang iya mga koneksyon nga wala nakahibalo ang iya mga superyor.
Ginpahayag man ni Ang nga sang nadalahig si Patidongan sa pagkadula sang isa ka kakompetensya sa cockfighting sa Manila sang ulihi nga bahin sang nagligad nga tuig, nahadlok ini nga mabuyagyag ang iya mga krimen. Gani subong, ginatudlo niya ang iya mga superyor bilang utok sa ginsiling niya nga himo-himo lang nga istorya ni alyas Totoy agud makapalagyo sa silot sa iya mga krimen.
