ROXAS CITY – Tuman ang pagpasalamat ni City Councilor Atty. Paul Ivan Baticados, matapos ini ang bag-o ileher nga Philippine Councilor’s League (PCL) President-Capiz Chapter.
Sa interview sang Bombo Radyo kay Atty. Baticados, ginpahayag sini nga nabatyagan niya ang pagbuylog sang mga Konsehales sa bug-os nga Capiz, agud ipahamtang ini sa nasambit nga posisyon.
Nahibaluan nga wala sang kasumpong ang mga na-eleher nga opisyal sang PCL-Capiz.
Samtang, isa sa nakikita nga pagpanghangkat para kay Baticados amu ang dungan nga pagpatigayon sang sesyon sang Sangguniang Panlalawigan kag Panlungsod, apang bukas ini sa posibilidad nga paghinyo sa duha ka Sanggunian kun mahimo nga may isa nga magabaylo sang ila adlaw sang sesyon, agud makatambong ini sa amu nga paghinun-anon.
Sa karon, indi sini luyag nga pangunahan ang PCL national, sa baylo, pagahulton niya ang palaabuton nga programa sang PCL agud makahimo sang tikang nga may nagakaigo nga koordinasyon sa kun ano man nga implementasyon.
