Nagpakita sang maayo nga pag-updanay sanday private prosecutor Atty Lorna Kapunan kag defense counsel Atty. Kristine Ferrer antes mag-umpisa ang ika-16 nga adlaw sang impeachment trial kay Vice President Sara Duterte, pila ka adlaw matapos ang ila mainit nga pagbayluhanay sa tion sang hearing.
Makit-an nga nagpalapit si Kapunan sa defence panel kag ginhakos si Ferrer. Nakita man nga nagayuhum si Ferrer samtang naga-istoryahanay ang duha.
Ginhakos man ni Kapunan si defense team spokesperson Atty. Michael Poa.
Suno kay Kapunan, ginhambalan niya si Ferrer nga indi pagtan-awon sang maayo ang mga komento sa social media bangud mahimo nga maksakit ang pila ka mga pahayag.
Samtang, ginkumpirma ni Ferrer nga maayo ang ila relasyon kag ginakabig pa niya nga daw iloy si Kapunan.
Madumduman nga mainit ang pagbayluhanay sang duha ka mga abogado sang nagligad nga semana angut sa limitasyon sang cross-examination sa ginpatigayon nga hearing sang impeachment case batok kay VP Duterte.
