Nakaguwa na sa presohan si Atty Levito Baligod kag ang apat ka anay bodyguards ni anay Ako Bicol party-list Representative Zaldy Co matapos nakapiyansa kasunod sang ila pagkadakop sa San Juan City.
Suno sa report, kaguwa ang lima matapos magpiyansa sang ₱10,000 kada isa.
Samtang, 10 pa ka mga anay bodyguards ni Co ang wala nakapiyansa antes matapos ang work hours kahapon.
Base sa arrest warrant nga gin-isyu sang Regional Trial Court Branch 69 sa Iba, Zambales, nagapangatubang sila sang kaso nga unjust vexation may kaangtanan sa Republic Act No. 10175 ukon Cybercrime Prevention Act of 2012.
Matandaan nga una na nga ginpahayag sang mga anay bodyguards nga nagdeliver sila sang mga maleta nga ginaalegar may unod nga kwarta para kay President Ferdinand “Bongbong” Marcos Jr., anay House Speaker kag Leyte Representative Martin Romualdez, kag iban pa nga mga indibidwal. Apang ginpanginwala nanday Marcos, Romualdez kag iban pa nga implikado ang mga alegasyon.
Sang Agosto, apat sa 18 ka mga anay bodyguards ang nagbawi sang ila ginpirmahan nga affidavit. Suno sa ila, luyag lang nila nga magpangabuhi sang malinong kag ginaalegar nga nagabaton sila sang mga pamahog sa ila kabuhi.
