Naghingyo si Atty Manases Carpio, asawa ni Vice President Sara Duterte, sa kortenga i-cancel ang subpoena nga gin-issue para sa iya tuigan nga Income Tax Returns (ITRs).
Ang nasambit nga subpoena ang gin-issue sang House Committee on Justice bilang kabahin sang ila imbestigasyon kun bala may yara sang bastante nga basehan para sa posible kaso nga impeachment batok kay VP Sara.
Gina-require sini ang Bureau of Internal Revenue nga magsumiter sang ITRs sang mag-asawa nga Duterte-Carpio humalin 2007 tubtub 2025.
Ginpanindugan ni Carpio, indi siya sakop sang kasubong nga hearing bangud indi siya partido sa kaso, gani gina-alegar nga wala sang hurisdiksyon sa iya ang komitiba.
Gindugang sini nga ginakabig nga pribado ang tax returns kag indi mahimo nga i-release kun wala sang pahanugot sang taxpayer.
Samtang, suno kay Bicol Saro Rep. Terry Ridon, may gahum ang House committee nga magpangayo sang mga dokumento may kaangtanan sa ila imbestigasyon agud madeterminar kun may yara sang bastante nga basehan para sa impeachment proceedings.
Ginpanindugan sang mamalidha nga indi mahimo nga ipilit ang privacy kon kabahin sang constitutional authority sang Kongreso ang nasambit nga bagay sa impeachment investigations.
