Nagpanindugan ang defense team ni VP Sara Duterte nga ang ‘probable cause’ nga nakita sang House Justice Committee sa duha ka impeachment complaints ang wala nagakahulugan nga ‘guilty’ ang bise presidente.
Sa interview sang Bombo Radyo kay Atty. Michael Poa, spokesperson sang defense panel, ginhatagan niya sang importansya nga ang pagtukib sang posible nga kabangdanan nagakahulugan lamang nga ang mga katapo sang komite nagpili nga magpadayon ukon ipasaka ang kaso sa plenaryo.
Suno sa iya, wala ini nagakahulugan nga guilty, liable, ukon nakahimo sang sala si Duterte.
Ginpahayag man sini nga indi na makatilingala ang desisyon sang komitiba, ilabi pa nga ginalauman man sang kampo ni Duterte nga magapadayon gid man sa full trial ang kaso sa Senado.
Sa pihak nga bahin, ginapanindugan sang defense team nga indi nagakaigo kag ilegal ang serye sang hearing nga ginpatigayon sang justice panel sa kaso nga impeachment batuk kay Duterte.
Matandaan nga naglawig sang apat ka hearing antes finally nagboto ang mga katapo sang komitiba kag nakit-an ang probable cause sa duha ka impeachment complaint.
Pahayag pa ni Poa, padayon nga nagatindog ang panel sang ila panindugan nga una na nga ginsumite sa Korte Suprema pinaagi sa petisyon nga untaton ang mga hearings.
