Nag-request sa International Criminal Court (ICC) si Atty. Nicholas Kaufman nga mag-withdraw bilang lead defense counsel ni former President Rodrigo Duterte sa kaso nga crimes against humanity matapos nga nag-expire na ang iya isa ka tuig nga kontrata sang Marso 31, 2026.
Sa isa ka dokumento nga ginpagwa sang ICC, ginpahayag ni Kaufman nga matapos ang iya pagbisita kay Duterte sa presohan sang Huwebes, nagpabutyag sang interest ang anay presidente nga maga-hire siya sang lain nga abogado para sa iya kaso.
Suno kay Kaufman, kumpiyansa siya nga may nagakaigo nga eksperyensya sa ICC ang magabulos nga legal counsel ni Duterte gani indi maapektuhan ukon ma-delay ang pagpadayon sa paghulag sang kaso sang anay presidente.
Magluwas sini, magapabilin nga confidential ang tanan nga impormasyon nga may kaangtanan sa kaso ni Duterte apisar natapos na ang professional relationship ni Kaufman sa anay Presidente.
Matandaan nga si Kaufman ang gin-appoint nga lead defense counsel sang Marso 2025 pagkatapos nga gindala si Duterte sa The Hague, Netherlands, sa idalom sang ICC warrant.
Samtang, ginpahanugutan man sang Trial Chamber III ang request ni Dov Jacobs nga mag-withdraw man bilang associate counsel ni Duterte, kasunod sang desisyon sang anay presidente nga i-reorganize ang iya defense team.
Sa subong, wala pa sang may ginpaguwa nga pahayag ang kampo ni Duterte angut sa identity sang ila bag-o nga lead defense counsel.
