Atty. Remia Bartolome, indi proud sa nangin resulta sang Lin-ay kag Hangaway sang Capiz 2024; Pageant, indi matawag nga preparado kag organisado

ROXAS CITY – Matigdas nga ginsiling ni Atty. Remia Fuentes Bartolome former IBP Capiz Chapter President, nga indi siya proud masiling nga Capiznon matapos ang palpak nga resulta sang Hangaway kag Lin-ay sang Capiz 2024 sang tinalikdan nga gab-i.

Sa interview sang Bombo Radyo kay Atty. Bartolome, ginpahayag sini nga dapat magasugod ang event 7:00 sang gab-i apang nalab-utan na sang 9:00 gab-i kag madamo pa sang mga kapalpakan nga natabo.

Una, ang indi maayo nga sound system kung sa diin, indi klaro nga mabatian sang mga tumalan-aw, ika-duha ang microphone nga makapaila ka beses nga gin-islan, ika-tatlo ang set up sang stage kag mga judges nga tuman kalayo agud malantaw kun tani sang maayo ang mga kandidata kag kandidato kag daw kaangay nga nangin isa ka cultural show ang amu nga pageant.

Suno kay Atty. Bartolome, makahuluya bangud ang mga judges indi lamang basta-basta kag indi kinahanglan nga pahulaton sang kasubong sadto kadugay ka gang resulta mga kapalpakan lamang.

Bangud sini, indi masiling nga preparado kag organisado ang amu nga event bangud madamo sang mga kapalpakan nga natabo kag lunsay mga negatibo nga komento ang iya nakikita kag nababaton sa kaangay niya nga tumalan-aw kung sa diin nagastos sang kwarta agud ibakal sang ticket.

Bangud sa kahuya, nadesisyunan niya suno diri nga magpauli na lamang kag wala na ginpatapos pa ang pageant.

Matapos ang natabo, wala man lang suno diri sang may nagpangayo sang pasaylo sa mga tumalan-aw ilabi na sa mga judges nga pila man sa mga naghulat kag nagsaksi.

Pahayag ni Atty. Bartolome nga kun tani indi pagbaliwalaon ang mga opinyon sang ordinaryo nga tawo bangud sila nakabulig sa amu nga event kag naghatag sang tion nga makalantaw kag bangud may yara sang ginbayaran dako suno diri ang gina-ekspektar kag indi ang palpak nga event.