ROXAS CITY – Nagahilibi-on nga ginpahayag ni Korina Bertolo Mantac, 20-anyos residente sang Barangay Milibili, Roxas City angut sa pagkaaresto sini kaupod ang 5 pa ka mga drug suspek sa ginkasa nga drug buy-bust operation sang PDEA Capiz sa Sitio Tunga, Barangay Tanque, Roxas City.
Suno diri, nagpadulong ini sa balay sang iya tiyo nga si Wally Arcangeles, 38-anyos, nga amu ang target sang PDEA agud magpangayo sang kuwarta nga inugbakal sang gatas sang iya 4-ka bulan nga lapsag apang ginkakibot sini nga nalakip siya gin-aresto sang mga otoridad.
Aminado man si Mantac, nga anay nagagamit ini sang iligal nga droga, apang iya na ini gintalikdan matapos nga nag busong.
Nakabalo man ini nga naga-gamit sang shabu ang iya tiyo apang indi sini matumod kun sa drugs halin ang masami ginapangayo nga kantidad.
Natalana nga ipa-idalom sa drug test si Mantac kaupod ang 5 pa nga nadakpan nga sanday John Alcher Acepcion, 25-anyos, residente sang Jumaguicjic, Roxas City, Rone Ubag baral, 41-anyos, residente sang Lawaan, Roxas City, kag Wyndel Albason Arcangeles, 41-anyos, Wynel Benlero Arcangeles, 51-anyos, Wally Benlero Arcangeles, 38-anyos nga lunsay residente sang Brgy. Tanque sining syudad.
Matandaan nakuha sa posisyon sang mga arestado ang 22 ka sachets sang suspected shabu, P5,500 buy-bust money kag mga drug paraphernalia.
