Arestado ang isa ka babaye matapos ginserbihan sang warrant of arrest sang mga kapulisan sa Roxas City Police Station sa Pueblo de Panay, barangay Lawaan, Roxas City.
Ginkilala ang arestado kay alyas “Elvie”, 50-anyos kag residente sang barangay Libas, syudad sang Roxas.
Sa impormasyon nga nakuha sang Bombo Radyo nagikan sa Roxas City Police Station, ginpahayag nga nagapangatubang sa kaso nga paglapas sa Batas Pambansa Blg. 22 ukon ang pag-isyu sang mga bounced check nga lipod sa ihibalo sang tag-iya.
Ang nasambit nga warrant of arrest ang gin-isyu kag ginpirmahan ni Hon. Meliza Joan P. Berano-Robite, Presiding Judge, Municipal Trial Court in Cities, Branch 2, Iloilo City kag napetsahan Hulyo 5, 2023.
Ginrekomendar naman sang korte ang pyansa nga balor P3,000 para sa temporaryo sini nga kahilwayan.
Sa karon, yara na ini sa kustodiya sang Roxas City Police Station para sa nagakaigo nga disposisyon.
