ROXAS CITY – Arestado ang isa ka babaye matapos mabaklan sang indi lisensyado nga armas-luthang sa ginpatigayon nga buybust operation sang kapulisan sa Sitio San Isidro, Brgy. Cagay, Roxas City.
Ginkilala ang arestado kay Raquel Delid, 46-anyos nga residente sang nasambit nga lugar.
Natigayon nga madakpan si Delid pinaagi sa isa ka pulis nga nagpakuno-kuno poseur buyer sa diin natigayon nga mabakal sa nadakpan ang isa ka caliber .38 revolver nga wala sang bala.
Nakuha man sa paghinakop sini ang P100.00 nga marked money, kag P2,500 boodle/counterfeit money.
Magapangatubang ang suspek sang kaso nga paglapas sa R.A. 10591 ukon “Comprehensive Law on Firearms and Ammunitions Regulation Act”.
Sa karon, nagapabilin ini sa paghinakop sang Roxas City PNP para sa nagakaigo nga disposisyon.
